![](https://www.sefhk.org/wp-content/uploads/2023/04/333931861_1210795402877394_5920625139436078025_n-1024x1024.jpg)
FRANK Esports(FAK)以6-3結束第一輪賽事。呢個禮拜PCS將會開始第二輪賽事,一齊睇下FAK表現如何。
VS HELL PIGS(HPS)
以年輕人為主嘅選手陣容嚟講表現不過不失,每一場都同對手有來有往。如果佢哋想晉級季後賽就要加倍努力啦,可能大家都等緊統神carry佢哋?
FAK:雷尼克頓、伊莉絲、崔絲塔娜、路西恩、娜米
HPS:卡桑帝、史瓦妮、阿祈爾、凱莎、艾希
開局12分鐘,FAK召喚預示者推下路一塔,HPS唔想FAK首塔輕易到手,雙方爆發3v3團戰。艾希冰箭先開娜米,史瓦妮想連控娜米俾路西恩擋曬。娜米受控完反手留住凱莎,路西恩有驚無險攞到首殺首塔。
19分鐘雙方爆發小龍團戰,Holo拼重成功。HPS集火雷尼克頓攞到一個人頭,但係FAK後排安穩輸出換返兩個。
27分半雙方爆發中路團戰。Solokill閃暈秒殺艾希,HPS集火雷尼克頓之後FAK冇前排唯有撤退,崔絲塔娜俾人留住陣亡,HPS成功攞到巴龍。
34分半HPS攞到巴龍之後撤退,雷尼克頓傳送繞後留住佢哋,隊友跟到佢自己已經殘血。卡桑帝同史瓦妮坦住傷害,阿祈爾同凱莎逐個擊破FAK成員。HPS打出1換4,解鎖生化科技龍魂。
41分鐘雙方爆發巴龍團戰,卡桑帝吸引火力幫助隊友攞巴龍。佢回城之後傳送中路繞後留住FAK。FAK集火卡桑帝,可惜太坦打佢唔死。HPS成員趕到接管戰場,阿祈爾空砂防壁推到3個FAK成員。HPS 0換5團滅FAK,贏下比賽。
VS J Team(JT)
重建完嘅JT整體表現仍然未如理想,如果佢哋想晉級季後賽同樣都要加倍努力啦。值得一提嘅係佢哋上個禮拜喺二隊提拔咗上路選手Long,佢係香港人嚟㗎!
JT:菲歐拉、悟空、杰西、希維爾、卡瑪
FAK:賈克斯、史瓦妮、杰西、路西恩、娜米
開局9分鐘雙方爆發小龍團戰,悟空閃大配合安妮閃大首殺路西恩。賈克斯傳送趕到配合杰西收割戰場。FAK打出1換4,攞下首龍。
20分半JT上中野 3人塔殺賈克斯失敗,FAK中輔到場支援,反殺JT 3人。與此同時,路西恩單殺希維爾,史瓦妮攞下聽牌龍。
24分鐘雙方爆發下路團戰,菲歐拉傳送繞後切後排,路西恩臨死前秒殺希維爾陪葬。安妮收下娜米,菲歐拉帶走杰西之後陣亡,JT打出2換3,挽回少少劣勢。
26分半FAK推下路擊殺悟空,推到門牙塔之後poke死希維爾。JT人數太少擋唔住FAK嘅攻勢,FAK獲勝。
VS Beyond Gaming(BYG)
BYG舊人帶新人策略成功,整體表現唔錯,不過之前輸俾SEM9 WPE令人意外。
BYG:賈克斯、古拉格斯、杰西、凱莎、納帝魯斯
FAK:弗拉迪米爾、悟空、卡莎碧雅、法洛士、雷歐娜
開局6分鐘BYG上野塔殺弗拉迪米爾,古拉格斯攞到首殺。12分半BYG 4人捉FAK下路失敗,納帝魯斯俾法洛士反殺。
25分鐘FAK開巴龍,雖然佢哋成功攞到巴龍,但係佢哋打完巴龍已經殘血。BYG收割戰場,打出1換4。
32分鐘FAK單捉凱莎之後開巴龍,無奈俾杰西poke殘唯有撤退。賈克斯同古拉格斯阻斷撤退路線,BYG喺缺乏凱莎核心輸出嘅情況下4打5,0換5團滅FAK。
團戰結束後,BYG一波推爆FAK主堡,BYG獲勝。
TLDR
FAK最後以1-2結束Week4旅程!FAK前期嘅表現唔錯,大部分時候都攞到優勢。中後期嘅表現有待改善,有時決策失誤扭轉比賽形勢。FAK比地獄豬雙殺真係大跌眼鏡,有統神嘅加持果然唔同啲!下個禮拜FAK將會大戰Deep Cross Gaming,希望FAK可以復仇打贏佢哋!!!
相關連結
PCS Twitch粵語頻道:https://www.twitch.tv/lolpacifichk